हा फोटो आहे इंडोनेशिया देशातल्या बाली येथील, गरुडावर स्वार असलेल्या श्री विष्णूंच्या सोनेरी पुतळ्याचा!... इंडोनेशियन लोकांच्या भाषेत Garuda Wisnu Kencana Statue किंवा GWK Statue... (इंडोनेशियन भाषेत Kencana म्हणजे सोने, सोनेरी, सुवर्ण, Gold)
१२२ मीटर (४०० फूट) उंच असलेला, कुठल्याही हिंदू देवतेचा, जगातला सर्वांत उंच पुतळा आहे हा! (वाचकांच्या अंदाजासाठी, हा पुतळा, अमेरिकेच्या स्टॅच्यू ऑफ लिबर्टीपेक्षा, ३० मीटर (१०० फूट) उंच आहे!)
आरसीसी कोअरवर स्टीलच्या फ्रेम्स आणि सर्वांत बाहेर तांबे आणि पितळ्याचे पत्रे/शीट्स अशा तंत्रज्ञानाने बनवलेल्या ह्या पुतळ्याचे उंची हे जसे एक वैशिष्ट्य आहे, तसेच आणखी एक वैशिष्ट्य म्हणजे, त्याची रुंदी... जगभरातले विविध पुतळे बघितले, तर त्यांची रुंदी ही उंचीच्या प्रमाणात खूपच कमी असते; पण ह्या गरुडावर स्वार असलेल्या विष्णूच्या पुतळ्यातल्या मुख्य शिल्पाची उंची आहे साधारण ७६ मीटर (२५० फूट), तर रुंदी आहे ६६ मीटर (२१७ फूट)... आणि ह्या रुंदीपैकी, गरुडाच्या शिल्पाची उंची आणि त्याच्या पंखांचा पसारा हा जवळजवळ सारखाच, म्हणजे ६४ मीटर (२१० फूट) आहे!...
हिंदू संस्कृतीचा उगम भारतात; प्राचीन भारतात ह्या संस्कृतीच्या आश्चर्यकारक प्रतिभा आणि प्रतिमा निर्माण झालेल्या जगाने बघितल्या; मात्र आधुनिक जगात, ती संस्कृती अभिमानाने बाळगून, unapologetic रीतीने जगाला सांगणारा मात्र इंडोनेशिया... हा आहे अत्यंत चुकीच्या पद्धतीने आपल्या भारतात राबवलेल्या ‘सर्वधर्मसमभाव’ ह्या संकल्पनेचा परिणाम...
- शरद केळकर